Новости

ДАУР АРШБА АҲӘЫНҬҚАРРАТӘ БЫЗШӘА АРҾИАРАЗЫ АҲӘЫНҬҚАРРАТӘ ПРОГРАММА  АПРОЕКТ АИҾКААРА ЗНАПЫ ИАНУ АКОМИССИА АИЛАТӘАРА МҨАԤИГЕИТ
04.07.2019 207

ДАУР АРШБА АҲӘЫНҬҚАРРАТӘ БЫЗШӘА АРҾИАРАЗЫ АҲӘЫНҬҚАРРАТӘ ПРОГРАММА АПРОЕКТ АИҾКААРА ЗНАПЫ ИАНУ АКОМИССИА АИЛАТӘАРА МҨАԤИГЕИТ

Аԥсны Аҳәынҭқарра Аминистрцәа Реилазаараҿы амилаҭтә бызшәа арҿиаразы 2020-2022 шықәсазтәи аҳәынҭқарратә программа апроект ашьақәыргылара зҭакԥхықәу акомиссиа актәи аилатәара мҩаԥысит.

Уи хантәаҩра азиуеит Аԥсны Аҳәынҭқарра актәи аԥыза-министр Даур Аршба.

Акомиссиа алахәцәа иара убас ирхыԥхьаӡалоуп аҳәынҭқарра анапхгара рхаҭарнакцәа, амасса информациатә хархәагақәа, аҭҵаарадырра, аҵарадырра, акультура усзуҩцәа.

«Аԥсуа бызшәа – иреиҳау доуҳатә малуп аԥсуаа ҳзы, уи алагьы, абызшәатә зҵаара иахьатәи аамҭазы аҳәынҭқарратә милаҭтә политика иреиҳаӡоу ахырхараҭақәа ируакуп, ҳмилаҭтә акзаара арӷәӷәара иафакторуп» – азгәеиҭеит Даур Аршба.

Акомиссиа аилатәараан, алахәцәа рыла иалкаан абызшәа ахархәараҿы иҟоу ахадаратә ԥырхагақәа, уи алагьы иазԥхьагәаҭан апроект ашьақәыргылараҿы хшыҩзышьҭра зҭаху аусмҩаԥгатәқәа, иалацәажәан амилаҭтә бызшәа арҿиараҿы зегьы зықәныҟәаша иаку аконцепциа алагалара шхымԥадатәиу.

Убас ала, акомиссиа ахаҭарнакцәа ражәалагалақәа иреиуан аҳәынҭқарратә усмҩаԥгара аԥсуа бызшәахьы аиагара, аорфографиатә жәарқәа аус рыдулара, атехникатә хархәагақәа рылшарала абызшәа аларҵәара уҳәа аусмҩаԥгатәқәа жәпакы.

Аҳәынҭқарратә бызшәа арҿиаразы 2020-2022 шықәсазтәи аҳәынҭқарратә программа апроект акомиссиа алахәцәа ражәақәа рыла, «Аԥсны Ахәынҭқарратә бызшәазы» Азакәан иашьашәало, 2019 шықәсазтәи абиуджет иалагалахоит.

Аилатәара ахыркәшамҭазы абызшәа арҿиаразы аҳәынҭқарратә программа ашьақәыргылара зҭакԥхықәу акомиссиа аҩныҵҟа аус зуша аусуратә гәыԥ аԥҵан.

Аԥсны аҳәынҭқарратә бызшәа арҿиаразы аҳәынҭқарратә программа апроект аиқәыршәара зҭакԥхықәу акомиссиа аԥҵан Аԥсны Аҳәынҭқарра Аминистрцәа Реилазаара Адҵа №115 ииун 28, 2019 шықәса инақәыршәаны.